Mae Vodafone wedi cyhoeddi Ysgoloriaeth PhD ym Mhrifysgol Abertawe, wedi’i hariannu’n llawn, i archwilio nwyddau gwisgadwy ‘ffitio ac anghofio’ 5G a fydd yn gwella gofal oedolion hŷn.
Bydd yr ymchwil yn defnyddio technoleg 5G i ddatblygu nwyddau gwisgadwy arloesol gyda'r nod o wella iechyd a lles oedolion hŷn yn sylweddol. Nod y prosiect yw datblygu technoleg wisgadwy, hawdd ei defnyddio ac sy'n gwella iechyd ac annibyniaeth oedolion hŷn, gan leihau'r baich ar y GIG.
Gan ganolbwyntio ar atebion iechyd personol, addasadwy a diwylliannol sensitif, bydd yr ymchwil yn pwysleisio profiadau unigryw grwpiau heb gynrychiolaeth ddigonol. Ei nod yw datblygu technolegau sy'n darparu ar gyfer anghenion amrywiol ac sy'n croesawu amrywiaeth i rymuso oedolion hŷn.
Tynnodd y pandemig COVID-19 sylw at effeithiolrwydd a chost-effeithlonrwydd technoleg â chymorth, gan arddangos buddion o ran monitro iechyd, rheoli meddyginiaeth, ac ymgynghoriadau ar-lein. Ond mae cyflwyno technoleg fel hyn yn heriol. Gwelwyd canlyniadau cymysg wrth ymgorffori dyfeisiau digidol i fywydau bob dydd, gyda diffyg dealltwriaeth ac felly brwdfrydedd yn cael ei ddangos gan rai cyfranogwyr. Mae patrymau amrywiol wrth ddefnyddio'r we hefyd ymhlith oedolion hŷn, gyda gwahaniaethau nodedig rhwng y rhywiau, sy’n cyflwyno her.
Mae'r tîm ehangach ym Mhrifysgol Abertawe ar hyn o bryd yn cydweithio ar adolygiad ymbarél o lythrennedd iechyd digidol mewn pobl hŷn, a fydd yn llywio camau cychwynnol y PhD.
Nod yr ymchwil yw cyd-ddylunio a chynghori ar ddatblygu nwyddau gwisgadwy 5G i wella monitro iechyd a lles defnyddwyr. Bydd y nodweddion allweddol yn cynnwys:
- Ychydig iawn o ryngweithio
- Monitro iechyd amser real
- Defnydd cynnal a chadw isel
Yna bydd prototeipiau o'r dechnoleg yn cael eu datblygu, gan ddefnyddio 5G i brofi a dilysu'r ymchwil mewn lleoliadau byd go iawn gydag astudiaeth sampl o ddefnyddwyr cymwys.
Bydd y dyfeisiau'n cynnig nifer o fanteision i oedolion hŷn, gan wella annibyniaeth, gwella diogelwch a rhoi tawelwch meddwl, yn ogystal â gwell cydgysylltu gofal i ofalwyr ac aelodau o'r teulu. Yn y pen draw, bydd yr ymchwil hefyd o fudd i ddarparwyr gofal iechyd, gan sicrhau ymyriadau amserol, penderfyniadau gwybodus ac effeithlonrwydd adnoddau.
Bydd ceisiadau'n cael eu derbyn tan 6ed Tachwedd 2024.