Ydych chi'n chwilio am gyllid i ddod â chynnyrch newydd i'r farchnad, neu i hyrwyddo syniad a allai gael effaith go iawn? Yma, mae Dominic Parkes, Ysgrifennwr Ceisiadau Datblygu Ymchwil ym Mhrifysgol Abertawe, yn egluro sut gall dod yn aelod o'n Rhwydwaith roi mantais i chi wrth nodi cyfleoedd ariannu ac ysgrifennu ceisiadau grant cystadleuol – a pham y gall cael y gefnogaeth gywir wneud gwahaniaeth mawr.

Arloesedd yw gwaed bywyd llawer o fusnesau, yn enwedig y rhai yn y sector gwyddorau bywyd eang ac amrywiol. Mae'n bwydo'r hopran o gynhyrchion neu wasanaethau newydd a nodedig a all roi mantais i fusnesau a sefydliadau eraill yn eu marchnad. Gall arloesedd llwyddiannus helpu i wahaniaethu busnes oddi wrth ei gystadleuwyr, gyrru refeniw a phroffidioldeb, a galluogi twf. I sefydliadau nad ydynt yn cael eu gyrru gan elw, fel mentrau cymdeithasol, gall fod yn fodd o gyflawni effaith gadarnhaol sy'n fuddiol i'r bobl a'r cymunedau maent yn eu cefnogi. Ond yn aml mae yna gost. I fusnesau llai yn benodol, gall cwrdd â'r costau sy'n gysylltiedig ag arloesedd - arbenigedd penodol, datblygu a phrofi iterus, mynediad at gyfleusterau, amser i'r farchnad - fod yn heriol.

Mae llywodraethau’n cydnabod gwerth arloesedd busnes fel sbardun cynnydd i gymdeithas a’r economi. Mae’n hanfodol ar gyfer mynd i’r afael â’r heriau mawr sy’n ein hwynebu, fel newid yn y hinsawdd, iechyd wrth heneiddio, maeth a diet iach, gordewdra a bygythiad pandemigau. Ac mae’n sbardun allweddol i’r economi, swyddi, a ffyniant a rennir.

Un ffordd o ymdopi â’r her o sicrhau cyllid ar gyfer arloesi busnes yw ceisio cyllid grant. Mae grantiau ar gyfer menter ac arloesi ar gael o amrywiaeth o ffynonellau gwahanol, gan gynnwys llywodraethau’r DU a llywodraethau rhanbarthol datganoledig. Innovate UK, er enghraifft, yw asiantaeth arloesi Llywodraeth y DU ac un o brif gyllidwyr grantiau arloesi busnes. Eu cenhadaeth yw helpu busnesau i dyfu trwy ddatblygu a masnacheiddio syniadau newydd ac addawol. Yn wahanol i fenthyciad, nid oes rhaid ad-dalu cyllid grant, ac fel arfer nid oes gofyniad i roi unrhyw ecwiti yn y busnes i ffwrdd nac i ildio unrhyw reolaeth fusnes. Mae’n darparu modd o alluogi a lleihau’r risg yn y broses arloesi, gan alluogi busnesau i ddatblygu ac ehangu yn y pen draw.

Ond mae ochr negyddol i gyllidau grant arloesi: mae'r broses o'i sicrhau yn aml yn teimlo'n frawychus. Mae hyn yn arbennig o wir i fusnesau bach heb yr adnoddau digonol i ymgysylltu â'r broses ceisio am grantiau. Mae'n bwysig ystyried y cwestiynau canlynol:

• Pa gyllid sydd ar gael?
• Pwy sy'n ei gynnig?
• Ble i chwilio am gyllid grantiau?
• Pa gynllun grant sydd fwyaf addas?
• Beth yw'r gofynion cymhwysedd?
• Beth sy'n cael ei ddisgwyl gan ymgeiswyr?
• Pwy arall sydd angen fod yn rhan ohono, neu allai rywun arall ddod â manteision drwy fod yn rhan ohono?
• Sut i ddod o hyd i gydweithredwyr a phartneriaid addas?
• Sut i lywio'r broses o ymgeisio?
• Sut i ysgrifennu'r cais – beth fydd yn gwneud iddo sefyll allan a chael y cyfle gorau o lwyddo?

Mae bron pob cais am grant yn seiliedig ar stori. Dyma'r stori o pam mae eich arloesedd yn gyffrous ac yn bwysig, a pham bod angen iddo gael ei gefnogi i wireddu ei botensial llawn ar gyfer eich menter, y gymdeithas ehangach a'r economi. Mae deall beth i'w gynnwys yn y stori honno, a sut i'w dweud mewn ffordd gymhellol a fydd yn cyffroi’r ariannwr, yw’r allwedd. Yn aml, mae cael dealltwriaeth am y cyllidwr a’u blaenoriaethau yn hanfodol – deall beth sy’n eu gwneud nhw weithio er mwyn sicrhau bod y cais yn taro’r nod.

Mae busnesau, rhai bach a chanolig yn benodol, fel arfer yn sefydliadau main sy'n tueddu i fod heb adnoddau ychwanegol ar gyfer ymgysylltu â'r broses grantiau. Ac yn aml nid oes ganddynt unrhyw brofiad nac arbenigedd o ran sut i wneud cais am grantiau a'u hennill. Mae ymgynghorwyr grantiau arbenigol yn bodoli, ond unwaith eto mae'r rhain yn dod â chost.

O fewn ein Rhwydwaith, mae gennym ni dîm o arbenigwyr sydd wedi'u trochi yn y broses grantiau arloesi. Wedi'n hymgorffori ym Mhrifysgol Abertawe, mae gennym fynediad at ystod eang o arbenigedd arloesi a grantiau, gwybodaeth am y broses grantiau, mewnwelediadau i ystod eang o wahanol ffynonellau ariannu, a phrofiad sylweddol o ysgrifennu grantiau. Rydyn ni'n rhan o rwydwaith helaeth o arbenigwyr academaidd ar draws ystod o ddisgyblaethau gwyddor bywyd, peirianneg a thechnoleg, gyda mynediad at seilwaith ac adnoddau uwch arbenigol ar draws y Brifysgol. Ac mae ein Rhwydwaith yn darparu mynediad at gyd-arloeswyr ar draws busnes a sectorau eraill, yn ogystal â chysylltiadau â lleoliadau gofal iechyd a chwaraeon elitaidd.

Drwy ddod yn aelod o'r Rhwydwaith Cenedlaethol ar gyfer Arloesedd mewn Chwaraeon ac Iechyd, byddwch yn ein rhoi ni ar eich tîm grantiau. Gallwn ni eich helpu i nodi a deall cyfleoedd ariannu addas, dod o hyd i gydweithwyr, datblygu eich cais am gyllid a llywio'r broses gyfan o wneud cais am gyllid arloesi. Rydyn ni yma i gefnogi cam nesaf eich taith arloesi.