Mae cydweithrediad rhwng Prifysgol Abertawe a Chanolfan Ymchwil Meddygaeth Frys Cymru yn Ysbyty Treforys yn dangos effeithiolrwydd symud ymchwil o'r labordy i ymarfer clinigol drwy ddod â pheiriannwyr, gwyddonwyt biofeddygol a chlinigwyr y GIG ynghyd.

Cafodd y cydweithrediad hwn ei ysgogi gan nod cyffredin i bontio ymarfer clinigol ag ymchwil academaidd, gan gymhwyso dulliau a thechnolegau newydd i heriau clinigol go iawn. Mae hyn wedi denu mwy na £6 miliwn mewn cyllid ymchwil ac wedi arwain at fwy na 50 o gyhoeddiadau, gan helpu i adeiladu gwybodaeth am glotiau gwaed a sut y gellir eu mesur.

Mae rhan allweddol o waith Dr Suresh Kumar Gopala Pillai a'r Athro Karl Hawkins wedi cynnwys datblygu dull arloesol i fesur rheoleg clotiau gwaed. Mae hyn wedi helpu ymchwilwyr ddeall yn well sut i fesur clotiau gwaed mewn anhwylderau ac wedi cyfrannu at ddatblygiadau mewn diagnosteg.

Un o ganlyniadau allweddol yr ymchwil oedd darganfod biomarciwr newydd o chwalu clotiau gwaed. Mae'r darganfyddiad hwn bellach yn ganolbwynt i brosiect newydd a ariennir gan EPSRC sy'n edrych ar sut y gellir chwalu clotiau gwaed. Nod y prosiect yw adeiladu ar yr ymchwil hon ac arwain y ffordd ar gyfer therapïau newydd i fynd i'r afael â chlotiau gwaed mewn clefydau.

Mae'r cydweithrediad hefyd wedi helpu i agor mynediad at arbenigedd blaenllaw yn y byd a chyfleoedd newydd ar gyfer ymchwil, gan gyfrannu at ddatblygiad diwylliant ymchwil o fewn meddygaeth frys yn y GIG. Mae Prifysgol Abertawe wedi darparu mynediad at dechnolegau gan gynnwys technegau delweddu clotiau gwaed uwch a datblygiadau mewn rheometreg, gan roi ffyrdd newydd i ymchwilwyr astudio clotiau gwaed.

Mae'r partneriaeth hefyd yn creu cyfleoedd i weithio yn y sectorau dyfeisiau fferyllol a meddygol, gan gynnwys archwilio sut y gellid mesur triniaethau newydd ar gyfer clotiau gwaed ac asesu eu heffeithiolrwydd. Gall hyn gael cymwysiadau ar draws ystod o gyflyrau lle mae clotiau gwaed yn bryder, gan gynnwys strôc.

Drwy ddod â pheiriannwyr, gwyddonwyt biofeddygol a chlinigwyr y GIG ynghyd, mae'r cydweithrediad yn dangos sut y gall gweithio ar draws disgyblaethau helpu i droi ymchwil academaidd i mewn i ddulliau newydd o ddeall, diagnosio a thrin anhwylderau clotio gwaed.